Ekki borga laun - bara arð!

Framganga Vilhjálms Egilssonar í þessu máli er orðin dálítið farsakennd. Nú hótar hann öllu illu, ef fyrirtæki, sem hafa efni á að hækka lægstu launin pínulítið, geri það. Talar um "þrýsting" frá verkalýðshreyfingunni. Ég held að flestir aðrir sjái að það var miklu fremur þrýstingur frá almenningsálitinu, sem kom forsvarsmönnum þessara sjávarútvegsfyrirtækja til að hækka lægstu launin um þessar 13.500 kr. sem gert hafði verið ráð fyrir.

Og þrýstingurinn frá almenningsálitinu stafaði einfaldlega af því að fólki ofbauð, að eigendur HB Granda skyldu ákveða að borga sjálfum sér arð í þessu árferði. Ég hef reyndar ekki séð haft eftir Vilhjálmi að neitt hafi verið við það að athuga. Það hefði getað verið kurteislegt af honum að kalla það t.d. "óheppilegt".

Af einhverjum ástæðum virðist þeim ríku alltaf þykja jafn sjálfsagt að heimta gróðann sinn. Einhvern veginn var maður að vona að svona hrikalegt áfall gæti þjappað þjóðinni saman og þeir sem hafa "breiðu bökin" væru nú tilbúnir að létta byrðum af öðrum, svona rétt á meðan við komumst yfir erfiðasta hjallann. En það er sennilega til of mikils mælst.

Samningar hanga á bláþræði

Athugasemdir

[Arnór (IP-tala skráð) 25.3.2009 kl. 01:05]

Samningsbrotið sem fælist í því að greiða ekki út arf væri það siðlausasta hingað til ef hugmyndir Jóhönnu hefðu fram að ganga. Nú er ég ekki hagsmunaaðili í þessu efni, ég á engin hlutabréf, en málið er ekki flókið. Það kaupir enginn heilvita maður hlutafé og færir þannig fé inn í atvinnurekstur bara til þess að geyma peninginn bundinn í hlutabréfum. Ríkistryggðir bankareikningar þjóna því hlutverki mun betur.

[Karma (IP-tala skráð) 25.3.2009 kl. 09:26]

Arnór: "Samningsbrotið sem fælist í því að greiða ekki út arf(arð)"

Hvað ertu eiginlega að tala um. Það eru engir samningar um það að borga út arð.

Aðal fjárfestingarvonin í hlutabréfakaupum hefur alltaf verið að þau hækki í verði. Ekki vonin að fá borgaðan arð af bréfunum.