Gáfaðir krakkar geta þetta

Það er óumdeilt að Menntaskólinn Hraðbraut byggir tilvist sína á samningi við menntamálaráðuneytið. En samningurinn virðist ekki auðtúlkaður. Ég dreg frásögn mbl.is ekki í efa, en samkvæmt henni ríkir nú ágreiningur um hvort ríkið hafi „átt að greiða tiltekna fasta fjárhæð á ári til skólans vegna húsaleigu“. Og vafalaust er ágreiningur um fleira.

En ...

Hugmyndiner bráðgóð. Að gefa betur greindum krökkum þann möguleika að taka menntaskólanámið á tveimur árum í stað fjögurra.

Ég var sæmilega greindur á unglingsárum og hefði þegið slíkt tilboð með þökkum. Einmitt þess vegna skil ég vel þá krakka (og foreldra) sem velja Hraðbraut.

En þarf slíkur skóli endilega að vera einkarekinn? Þarf slíkur skóli að eiga sér skólameistara sem ekki lætur sér nægja að hafa sæmileg laun, heldur vill líka fá greiddan hagnað?

Af hverju er því haldið svona staðfastlega fram að einungis einkaframtakið geti boðið upp á valkosti?

Ég held að við getum gert þetta sjálf. Ég hygg að tveggja ára menntaskóli fyrir bráðgreinda unglinga geti staðið á eigin fótum – án aðkomu fólks sem langar að græða.

En Menntaskólinn Hraðbraut var stofnaður af einkaframtaksmanni og í skjóli þess menntamálaráðherra sem þá ríkti.

Það er svo sem ekki flókið.

En ég spyr: Hvort skiptir máli, menntunin eða hagnaðurinn?

Stendur við útreikninginn

Athugasemdir

[Palli (IP-tala skráð) 28.10.2010 kl. 02:46]

Það væri dapurt ef lokað yrði á þennan 2 árar möguleika. Það virðist sem einkageirinn sé haldinn meiri metnaði en hinn opinberi. Kostar ekki stúdentsprófið hjá Hraðbraut mun minna fyrir ríkið en stúdentsprófið hjá öðrum menntaskólum?

[Guðjón Sigþór Jensson, 28.10.2010 kl. 13:38]

Ríkisendurskoðun er ekki að tala um að loka skóla þessum heldur að leiðrétta mistök sem beinast að skólanum. Ef þið lesið fréttatilkynninguna frá þessari stofnun er ljóst að skóli þessi hafi fengið mun meira fé en eðlilegt getur talist. Spurning hvort um blekkingar og svik hafi verið um að ræða en sjálfsagt fer Ríkisendurskoðun betur í saumana á þessu máli.

Mosi